पाँचथर गोल्डकप २०८१: खेल तालिका सार्वजनिक, पहिलो खेल फागुन २४ गते

पाँचथर। पाँचथरको सदरमुकाम फिदिममा फागुन २४ गतेदेखी चैत्र २ गतेसम्म सञ्चालन हुन गइरहेको पाँचथर गोल्डकपको ५ औ संस्करणको खेल तालिका सार्वजनिक भएको छ।
आयोजक पाँचथर क्लब पाँचथरले सार्वजनिक गरेको तालिका अनुसार फागुन २४ गते उद्घाटन खेलमा आयोजक पाँचथर क्लब पाँचथर र पथरी ११, फुटबल क्लब मोरङविच प्रतिस्पर्धा हुनेछ। त्यस्तै खेलको दोस्रो दिन फागुन २५ गते चर्च बोइज युनाइटेड फुटबल क्लब काठमाडौँ र हिल्स फुटबल एकेडेमी भारत आमनेसामने हुनेछन्।
फागुन २६ गते तेस्रो खेलमा मछिन्द्र फुटबल क्लब काठमाडौँले हिमालय शेर्पा फुटबल क्लब काठमाडौसंग प्रतिस्पर्धा गर्ने छ भने चौथो खेल अर्थात फागुन २७ गते सप्तरीको नमोबुद्ध युथ क्लब र नेपाल पुलिस क्लब प्रतिस्पर्धा गर्ने तालिका रहेको छ।
प्रतियोगिताको पहिलो सेमिफाइनल खेल फागुन २८ गते र दोस्रो तथा अन्तिम सेमिफाइनल खेल फागुन २९ गते हुने आयोजक पाँचथर क्लब पाँचथरका अध्यक्ष कमल तुम्रोकले जानकारी दिनुभयो । फाइनल खेल भने चैत्र २ गते हुने छ ।
फिदिम मा.वि को खेलमैदानमा हुने प्रतियोगिताको विजेताले उपाधि सहित ११ लाख १ हजार १ सय ११ रुपैँया प्राप्त गर्दा उपविजेता टिमले ५ लाख ५५ हजार ५ सय ५५ रुपैँया प्राप्त गर्नेछ।
विद्यागतर्फ मेन अफ दि म्याच, बेष्ट कोच, हाई स्कोरर, बेष्ट गोलकिपर, बेष्ट डिफेन्डर, बेष्ट मिडफिल्डर, राईजिङ प्लेयर, बेष्ट प्लेयर र फ्यान अफ दि म्याचलाई पुरस्कारको व्यवस्था गरिएको आयोजकले जनाएको छ । त्यस्तै केही खेलाडी, अफिसियल र दर्शकहरुको पनि सामुहिक दुर्घटना बिमा गरिने पनि आयोजकले जनाएको छ ।