नेपालका नयाँ उद्यमीलाई प्रोत्साहन गर्न चार विद्यार्थीको अग्रसरता: ‘गैरनाफामूलक संस्था’ मार्फत सिड फण्ड र मेन्टरसिप दिइने

काठमाडौँ। नेपालमा नवीन सोच र उद्यमशीलताको क्षमता भएका युवाहरूको कमी छैन। तर, प्रारम्भिक पुँजी (Seed Fund), व्यावसायिक परामर्श र उपयुक्त सञ्जाल (Networking) को अभावमा धेरै सम्भावना बोकेका अवधारणाहरू विचारमै सीमित हुने गरेका छन्। यही समस्याको व्यावहारिक समाधान खोज्न कलेज अफ इन्फर्मेसन टेक्नोलोजी एन्ड इन्जिनियरिङ (CITE) मा अध्ययनरत चार जना विद्यार्थीहरूले गैरनाफामूलक संस्था (Non-profit Organization) स्थापना गरी सहयोगको पहल थालेका छन्।

उद्यमशील सोच र नयाँ आइडिया बोकेका युवाहरूलाई सहयोग गर्ने उद्देश्यले कलेज अफ इन्फर्मेसन टेक्नोलोजी एन्ड इन्जिनियरिङ (CITE) मा अध्ययनरत साश्वत खतिवडा, दिव्या बोगटी, आयुषा निरौला र अनिश थापाले यो सामाजिक संस्थाको सुरुवात गरेका हुन्।

(तस्बिरमा बायाँबाट: साश्वत खतिवडा, आयुषा निरौला, अनिश थापा र दिव्या बोगटी)

संस्थाले कसरी काम गर्नेछ?

संस्थाले नयाँ व्यवसाय सुरु गर्न चाहने युवाहरूलाई लक्षित गरी निम्न सुविधाहरू प्रदान गर्ने लक्ष्य राखेको छ:

• सल्लाह र मार्गदर्शन (Mentorship & Advice): व्यावसायिक योजना निर्माण, जोखिम व्यवस्थापन र सोचलाई बजारयोग्य बनाउन विशेषज्ञ परामर्श उपलब्ध गराइनेछ।

• पुँजी जुटाउन सहयोग (Fundraising): प्रारम्भिक चरणका उद्यमीहरूलाई आवश्यक पर्ने ‘सिड फण्ड’ उपलब्ध गराउन सम्भावित लगानीकर्ताहरूसँग सहजीकरण गरिनेछ।

• सञ्जाल विस्तार (Networking & Connections): नवउद्यमीहरूलाई सम्बन्धित क्षेत्रका विज्ञ, उद्योगी र लगानीकर्ताहरूसँग सीधा सम्पर्क स्थापित गराइनेछ।

मुख्य सल्लाहकार तथा परिकल्पनाकार

यस अभियानका मुख्य परिकल्पनाकार तथा योजनाकार इन्जिनियर मदन बहादुर शाही हुनुहुन्छ। उहाँले अभियानलाई प्राविधिक तथा रणनीतिक मार्गदर्शन प्रदान गर्दै यसको प्रभावकारी कार्यान्वयनमा महत्वपूर्ण भूमिका निर्वाह गरिरहनुभएको छ। नेपालको सूचना प्रविधि (IT) उद्यमशीलताको क्षेत्रमा लामो अनुभव बटुल्नु भएका इन्जिनियर शाही कलेज अफ इन्फर्मेसन टेक्नोलोजी एन्ड इन्जिनियरिङ (CITE) का प्राध्यापक (Lecturer) समेत हुनुहुन्छ। उहाँकै अनुभव र परामर्शको जगमा विद्यार्थीहरूले यस संस्थाको रूपरेखा तयार पारेका हुन्।

“नेपालमा स्टार्टअप र नयाँ सोच भएका युवाहरूलाई सुरुवाती चरणमा प्रोत्साहन गर्ने संयन्त्रको ठूलो अभाव छ। विद्यार्थीहरूले स्वतःस्फूर्त रूपमा सुरु गरेको यो प्रयासले सम्भावना बोकेका नयाँ उद्यमीहरूलाई अगाडि बढाउन ठूलो मद्दत पुर्याउनेछ,” मुख्य सल्लाहकार इन्जिनियर शाहीले बताउनुभयो।”

नेपालमा सरकारी वा गैरसरकारी निकायबाट स्टार्टअपहरूलाई प्रारम्भिक सहयोग गर्ने संरचना अझै व्यवस्थित हुन नसकेको अवस्थामा, युवा विद्यार्थीहरूकै अग्रसरतामा सुरु भएको यो अभियानले नयाँ पुस्ताका उद्यमीहरूका लागि महत्त्वपूर्ण आधार तयार गर्ने अपेक्षा गरिएको छ।