ढुङ्गाले प्रहार गरेर एक जनाको हत्या, आरोपि पक्राउ

रवीन्द्र काफ्ले (रासस)

पाँचथर, १० वैशाखः

पाँचथरको हिलिहाङ गाउँपालिकामा ढुङ्गाले प्रहार गरेर एक जनाको हत्या भएको छ। हत्याका आरोपिलाई प्रहरीले नियन्त्रणमा लिएको छ।

हिलिहाङ गाउँपालिका–६ भारपाका ५२ वर्षीय धनप्रसाद यवाको बुधवार बेलुकी ढुङ्गाले प्रहार गरी हत्या भएको हो। हिलिहाङ–७ चुक्फारा पुगेका यवालाई सोही स्थानका हरिप्रसाद योक्पाङदेनले ढुङ्गाले टाउको प्रहार गरी हत्या गरेका हुन। बुधवार साँझ यवा र योक्पाङ्देनले सोही स्थानका होमप्रसाद थापाको पसलमा पादक पदार्थ सेवन गरेपछि झगडा सुरु भएको पाइएको जिल्ला प्रहरी कार्यालय पाँचथरका सूचना अधिकारी रामचन्द्र शाहले जानकारी दिनुभयो। 

झगडाका क्रममा योक्पाङ्देनले ढलेका यवाको टाउकोमा ढुङ्गाले प्रहार गर्दा घटनास्थलमै ज्यान गएको हो। योक्पाङ्देनलाई बुधवार राती नै प्रहरीले नियन्त्रणमा लिई अनुसन्धान थालेको छ भने मृतकको शव परीक्षणपश्चात परिवारलाई जिम्मा लगाइएको शाहले जानकारी दिनुभयो। यवा के कारणले उक्त स्थानमा पुगेका थिएभन्ने खुल्न बाँकी रहेको र दुईवीच यसअघि चिनजान नरहेको पाइएको शाहले वताउनुभयो।