Bishwa Sanchar 
पाँचथर-पाँचथरमा निर्वाचन रिपोर्टिङ तथा पत्रकार आचारसंहिता सम्बन्धी अभिमुखीकरण कार्यक्रम सम्पन्न भएको छ। नेपाल पत्रकार महासंघ पाँचथर को आयोजनामा शुक्रबार कार्यक्रम सम्पन्न भएको हो।
आन्तरिक मामिला तथा कानून मन्त्रालय कोशी प्रदेश को सहयोग तथा नेपाल पत्रकार महासंघ कोशी प्रदेश को सहकार्यमा आयोजित कार्यक्रममा पाँचथरका मुख्य निर्वाचन अधिकारी तथा जिल्ला अदालत पाँचथरका न्यायाधीश कुमार मास्के को प्रमुख आतिथ्यता रहेको थियो। साथै राष्ट्रिय मानव अधिकार आयोग का सचिव मुरारीप्रसाद खरेल को विशेष आतिथ्यता रहेको थियो।
कार्यक्रम नेपाल पत्रकार महासंघ पाँचथरका अध्यक्ष भिमकुमार बाँस्कोटा को अध्यक्षतामा सम्पन्न भएको थियो। कार्यक्रममा महासंघका पूर्व अध्यक्ष लक्ष्मी गौतम, कोशी प्रदेश समितिका पूर्व सदस्य गणेश साम्पाङ, फोनिजका कोशी प्रदेश अध्यक्ष बिजयबोध लावती, नेपाल प्रेस युनियन पाँचथर का अध्यक्ष खबिन लुईटेल तथा प्रेस चौतारी नेपाल पाँचथर का अध्यक्ष मदन थापा लगायत विभिन्न पेशागत संगठनका प्रतिनिधिहरू अतिथिको रूपमा सहभागी थिए।
अभिमुखीकरण कार्यक्रममा जिल्लाका २५ जना क्रियाशील पत्रकारहरूको सहभागिता रहेको थियो। कार्यक्रमको सहजीकरण महासंघका पूर्व अध्यक्ष लक्ष्मी गौतमले गरेका थिए।
सोही अवसरमा मानवअधिकार र पत्रकारिता विषयमा राष्ट्रिय मानव अधिकार आयोगका सचिव मुरारीप्रसाद खरेलले धारणा राखेका थिए।
