वडाले गर्‍यो विजेता खेलाडी सम्मान

रमेश थापा
यासोक-पाँचथरको कुम्मायक गाउँपालिका–१ नम्बर वडा कार्यालयले खेलाडीहरुलाई सम्मान गरेको छ। वडाले वडा कार्यालय यासोकमा एक कार्यक्रमको आयोजना गरी खेलाडी सम्मान गरेको हो। माघे सङ्क्रान्तिको अवसरमा कुम्मायक–४ रानीगाउँको तिङदेनमा सम्पन्न भएको वडा स्तरीय फुटबल प्रतियोगिताको फाइनल खेल कुम्मायक–१ यासोकले जितेको थियो। फाइनल खेल जित्न सफल भएका वडाका खेलाडीहरुलाई खादा ओढाएर नगद सहित सम्मान गरिएको वडाअध्यक्ष देबेन्द्रकुमार लावतीले जानकारी दिए। खेलक्षेत्रको विकास र खेलाडीहरुको हौसला बढाउने उदेश्यले खेलाडीलाई नगद सहित सम्मान गरिएको लावतीको भनाइ छ।
खेलाडी सम्मान कार्यक्रममा गाउँपालिका अध्यक्ष वंम प्रसाद लावतीले गाउँपालिकाले खेलाडीहरुको वृद्धि र विकासको लागि बजेट बिनियोजन गरी काम गर्दै आएको बताए। गाउँपालिकाबाट बिभिन्न क्षेत्रमा सहभागी भएर खेल जित्न सफल भएका खेलाडीहरुलाई बिभिन्न समयमा सम्मान गर्दै आएको बताउँदै लावतीले आगामी दिनमा पनि खेल क्षेत्रको विकासका लागि गाउँपालिकाले काम गर्ने बताए।
वडा कार्यालाय कुम्मायक–४ को आर्थिक सहयोगमा खेलकुद कार्यक्रम संचालन समिति रानीगाउँले आयोजना गरेको प्रतियोगितामा आयोजक कुम्मायक–४ रानीगाउँ विरुद्ध ५–१ को फाराकिलो जित निकाल्दै कुम्मायक १ यासोक च्याम्पियन बनेको थियो। बिजेता टीमले नगद २५ हजार ५५५ रुपैयाँ ट्रफि मेडल र प्रमाणपत्र हात पारेको थियो।