फिदिम नगरपालिकाको निर्णय: किरिया खर्च देखि निशुल्क एम्बुलेन्स सेवा

रमेश थापा
पाँचथर । पाँचथरको फिदिम नगरपालिकाले नगरक्षेत्रका नागरिकलाई किरिया खर्च दिने भएको छ । नगरपालिकाले “विपन्नसँग नगरप्रमुख कार्यक्रम कार्यान्वयन सम्बन्धी मापदण्ड २९८१ लागु गरे संगै नगरक्षेत्रका नागरिकलाई किरिया खर्च दिने निर्णय गरेको हो ।
नगरपालिकाको सभाहलमा पत्रकार भेटघाट कार्यक्रमको आयोजना गरी कार्यपालिकाको बैठकले गरेका निर्णयहरु सार्बजनिक गर्दै ‘बिपन्नसँग नगर प्रमुख’ कार्यक्रम सम्बन्धी मापदण्ड २०८१ स्वीकृत गरेको हो । फिदिम नगरपालिकाले नगरपालिका भित्र स्थायी  बसोबास गरेका परिवारका सदस्यहरुको मृत्यु भएमा नगद रु १० हजार रुपैँयाका दरले किरिया खर्च उपलब्ध गराउने निर्णय भएको नगरप्रमुख मित्रप्रसाद काफ्लेले जनाए ।
त्यस्तै नगरको अर्को महत्वपूर्ण निर्यणको रुपमा ‘कोखदेखि शोकसम्म’ कार्यक्रम मार्फत छुटसहितको एम्बुलेन्स सेवा सञ्चालन गर्ने भएको छ । गर्भवती महिलाहरुको लागि साथै ७५ बर्ष माथिका ज्येष्ठ नागरिक र ‘क’ बर्गको अपाङ्गता परिचय भएका नागरिकको लागि  जिल्ला अस्पताल र घरसम्म आवतजावत गर्न शत प्रतिशत छुट दिने निर्णय भएको छ । तर यो छुट अन्यको हकमा लागुहुने छैन । नगरक्षेत्रका अन्य नागरिकलाई भने १० प्रतिशत छुटको व्यवस्था मात्रै गरिएको प्रमुख काफ्लेले भनाइ छ । नगरपालिकाले दिएको सुविधा लिन सेवाग्राहीले सम्बन्धित वडा अथवा नजिकको स्वास्थ्य संस्थाको बिशेषज्ञ वा स्वास्थ्यकर्मीको सिफारिश लिनुपर्ने व्यवस्था गरिएको छ ।
त्यसैगरी नगरपालिका भित्र आयोजना हुने मेला, महोत्सव, सांस्कृतिक तथा खेलकुद प्रतियोगिताहरुको लागि नगरपालिकाले आर्थिक सहयोग गर्दा नगरपालिकालाई स्वतः प्रबद्र्धक र मूख्य प्रबद्र्धक हुने शर्त राखेर सहयोग गर्ने निर्णय गरेको छ । अबदेखि तीन लाखभन्दा माथिको आर्थिक सहायता उपलब्ध गराउँदा नगरपालिकालाई अनिवार्य रुपमा मूख्य प्रबद्र्धक स्वीकार गर्नुपर्ने निर्णय उल्लेख गरिएको छ ।