कुम्मायक गोल्डकप : फाल्गुनन्द गाउँपालिका सेमिफाइनमा

रमेश थापा
पाँचथर-पाँचथरको कुम्मायक गाउँपालिकामा जारी छैटौ संस्करणको कुम्मायक गोल्डकप प्रतियोगितामा कुम्मायक गाउँपालिकालाई हराउँदै फाल्गुनन्द गाउँपालिका सेमिफाइनमा प्रवेश गरेको छ । हिजोदेखि सुरु भएको पृथ्वी माविमा सम्पन्न भएको पहिलो खेलमा कुम्मायकलाई ४–१ को फराकिलो अन्तरले हराउँदै फाल्गुनन्द सेमिफाइनलमा प्रवेश गरेको हो । फाल्गुनन्दको तर्फबाट खेलको ४ औं मिनेटमा आशिस नेम्वाङले सुरुवाती गोल गरे । भने १९ औं मिनेटमा लक्ष्मण चेम्जोङले गोल गर्दै अग्रता बनाए । खेलको दोस्रो हाफको ६४ मिनेटमा आशिस नेम्वाङ र अतिरिक्त समयमा पुनःलक्ष्मण चेम्जोङले गोल गर्दै ४–१ को अग्रता बनाए।
दबावमा परेको कुम्मायकको तर्फबाट शुसिल लावतीले पहिलो हाफको ३१ औं मिनेटमा सान्तवना गोल फर्काएका थिए । कुम्मायकका निश्चल बस्नेतले रेडकार्ड पाउँदै खेलबाट बाहिरिएका थिए । निर्धारित समयमा कुनै पनि गोल गर्न नसक्दा कुम्मायकले फराकिलो हार भोग्न बाध्य भयो। प्रतियोगिताको उकृष्ट खेलाडी फाल्गुनन्दका लक्ष्मण चेम्जोङ घोषित हुदै नगद ३ हजार हात पारे ।
प्रतियोगिताको बिजेताले नगद १ लाख २५ हजार ५५५ रुपैयाँ सहित चाँदीको ट्रफि, मेडल र प्रमाणपत्र प्राप्त गर्नेछ भने उपबिजेताले ७५ हजार ५५५ रुपैयाँ सहित ट्रफि, मेडल र प्रमाणपत्र प्राप्त गर्नेछ । आजको दोस्रो दिनको पहिलो खेल म्याङलुङ नगरपालिका तेह्रथुम र याङवरक गाउँपालिका पाँचथर बीच हुनेछ । त्यस्तै दोस्रो खेल फिदिम नगरपालिका र हिलिहाङ गाउँपालिका र तेस्रो खेल तुम्बेवा र फालेलुङ गाउँपालिका बीच हुने आयोजक कुम्मायक स्पोटिङ क्लवले जनाएको छ । प्रतियोगिता जेठ ५ गतेसम्म संचालन हुनेछ ।