रेड हर्षलाई हराउँदै म्याङलुङले उचाल्यो कुम्मायक कुस्सायक त्रिशाली आमन्त्रण गोल्डकपको उपाधि

फाइनल खेलमा उत्कृष्ट प्रदर्शन गर्दै म्याङलुङका पुजन चौधरी ‘म्यान अफ द म्याच’ घोषित भए। उनले नगद रु. ७ हजार प्राप्त गरेका छन्। त्यस्तै अन्जली लिम्बु र जमिन लिम्बु ‘फ्यान अफ द म्याच’ घोषित हुँदै जनही रु. १,५०० का दरले पुरस्कृत भएका छन्।

विधागत पुरस्कारतर्फ प्रतियोगिताको सर्वोत्कृष्ट खेलाडी म्याङलुङका सन्तोष लिम्बुले रु. १५ हजार नगद पुरस्कार प्राप्त गरे। उदियमान खेलाडी यलम्बर युवा संस्थाका माराम फेवादेन, उत्कृष्ट डिफेन्डर रेड हर्ष एफसीका सुगम लिम्बु, उत्कृष्ट मिडफिल्डर रेड हर्ष एफसीकै म्यागनेट लिम्बु, उत्कृष्ट फरवार्ड म्याङलुङका निस कुमार श्रेष्ठ तथा उत्कृष्ट गोलकिपर म्याङलुङका प्रेम लिम्बुले जनही रु. १० हजार नगद पुरस्कार प्राप्त गरे।

त्यस्तै, सर्वाधिक गोलकर्तातर्फ म्याङलुङका सन्तोष लिम्बु र यलम्बर युवा संस्थाका लोकेन्द्र थापाले समान ३–३ गोल गर्दै संयुक्त रूपमा रु. १२ हजार पुरस्कार प्राप्त गरे। उत्कृष्ट प्रशिक्षकतर्फ म्याङलुङका प्रविन मोते घोषित हुँदै रु. ७ हजार नगद पुरस्कार हात पारे।

कार्यक्रममा विभिन्न जनप्रतिनिधि, संघसंस्थाका प्रमुख तथा प्रतिनिधि, राजनीतिक दलका प्रमुख तथा प्रतिनिधि लगायत हजारौँ दर्शकको उल्लेखनीय उपस्थिति रहेको थियो। प्रतियोगिता ट्रफी, मेडल र प्रमाणपत्र, हस्तान्तरण र मायाको चिन्हो बितरणसहित भव्य रूपमा सम्पन्न भएको छ।

परापूर्वकालदेखि प्रत्येक तीन वर्षमा आयोजना हुँदै आएको तङ्सुम तङ्नाम (त्रिशाली) पूजा तथा मेलाको अवसरमा यस प्रतियोगिता कुम्मायक कुस्सायक धार्मिक तथा पर्यटकीय स्थलको प्रचारप्रसार गर्ने साथै  स्थानीय तथा राष्ट्रिय स्तरमा खेलकुदको विकास गर्ने उद्देश्यका साथ आयोजना गरिएको आयोजक यलम्बर युवा संस्थाले जनाएको छ।