तुम्बेवा अध्यक्ष कप: फक्ताङलुङ, सन्जिवनी र तुम्बेवा–१ सेमिफाइनलमा

पाँचथर-पाँचथरको तुम्बेवा गाउँपालिका मा जारी “चौथो अध्यक्ष कप खुल्ला पुरुष फुटबल प्रतियोगिता–२०८३” को सेमिफाइनल समिकरण पूरा भएको छ।

मंगलबार सम्पन्न दोस्रो क्वाटरफाइनलमा फक्ताङलुङ एफसी ले एम एफसीलाई ३–२ गोलले पराजित गर्दै सेमिफाइनलमा स्थान बनाएको हो।

त्यस्तै, तेस्रो क्वाटरफाइनलमा सन्जिवनी स्पोर्टिङ क्लब धनकुटा ले कुम्मायक स्पोर्टिङ क्लब लाई १–० गोलले हराउँदै सेमिफाइनलमा प्रवेश गरेको छ। सन्जिवनीले अब सेमिफाइनलमा सुम्निमा पारूहाङ एफसी सँग प्रतिस्पर्धा गर्नेछ।

यस्तै, अन्तिम क्वाटरफाइनलमा डिफेन्डिङ च्याम्पियन आयोजक टोलीलाई तुम्बेवा–१ ले २–१ गोलले पराजित गर्दै सेमिफाइनलमा स्थान सुरक्षित गरेको छ। अब तुम्बेवा–१ ले फक्ताङलुङ एफसीसँग फाइनल प्रवेशका लागि प्रतिस्पर्धा गर्नेछ। दुवै सेमिफाइनल खेल जेठ ६ गते बुधबार हुने आयोजकले जनाएको छ।

महिला फुटबलतर्फ हाङगुम फाइनलमा

अध्यक्ष कप अन्तर्गतको वडा स्तरीय महिला फुटबल प्रतियोगिताको पहिलो सेमिफाइनलमा तुम्बेवा–५ हाङगुम ले तुम्बेवा–४ वलने लाई १–० गोलले पराजित गर्दै फाइनलमा स्थान बनाएको छ।

महिला प्रतियोगिताको दोस्रो सेमिफाइनल बुधबार वडा नं. १ र वडा नं. ३ बीच हुने छ।

जेठ ७ गतेसम्म सञ्चालन हुने प्रतियोगिताको पुरुषतर्फ विजेता टोलीले नगद रु. २ लाख २ हजार २ सय २२ रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले रु. १ लाख १ हजार १ सय ११ रुपैयाँसहित ट्रफी, मेडल र प्रमाणपत्र प्राप्त गर्नेछन्।

त्यस्तै, महिला तर्फको विजेताले नगद रु. ३३ हजार ३ सय ३३ रुपैयाँसहित ट्रफी प्राप्त गर्नेछ भने उपविजेताले रु. १६ हजार ३ सय ३३ रुपैयाँसहित ट्रफी हात पार्नेछन्।