कुम्मायकमा शल्यकृया सहितको आँखा शिविर संचालन हुदै

रमेश थापा
यासोक-पाँचथरको कुम्मायक गाउँपालिकास्थित यासोक बजारमा बैशाख २५ गतेदेखि २६ गतेसम्म दुईदिने शल्यकृया सहितको निःशुल्क आँखा शिविर सञ्चालन हुने भएको छ। नेपाल नेत्रज्योति संघ ताप्लेजुङको संयोजन, कुम्मायक गाउँपालिकाको आर्थिक साझेदारी र मेची आँखा अस्पताल बिर्तामोडका चिकित्सक तथा प्राविधिकहरुको उपस्थितिमा आँखा शिविर सञ्चालन हुन लागेको हो।
निःशुल्क आँखा स्वास्थ्य शिविरमा सेवा फाउण्डेसनको सहयोगमा नेपाल नेत्रज्योति संघले चिकित्सक तथा प्राविधिकहरुको व्यवस्थापन गर्ने भएको छ। नेपाल नेत्रज्योति संघ ताप्लेजुङद्धारा सञ्चालित डिचेन डोङ्गला स्मारक आँखा उपचार केन्द्रका क्लिनिक इञ्चार्ज काजीमान गुरुङका अनुसार नेत्रज्योति संघ ताप्लेजुङले शिविरमा ४० बर्ष माथि उमेर समुहका नागरिकलाई अनिवार्य रुपमा लगाउनु पर्ने रिडेवल चश्मा समेत निःशुल्क रुपमा उपलब्ध गराउने भएको छ । कुम्मायक गाउँपालिकाले पालिकाका सेवाग्राहीलाई निःशुल्क रुपमा औषधि उपलब्ध गराउने भएको छ ।
शिविरमा गाउँपालिकाले पाँच वटा वडाबाटै मोतिविन्दु भएका बिरामीको छनौट हुनेछ । जसअनुसार बैशाख १९ गते रानीगुफा सामुदायिक स्वास्थ्य इकाई कुम्मायक १ खाल्डे, २० गते माङजाबुङ स्वास्थ्य चौकी कुम्मायक -२, २१ गते स्याबरुम्बा स्वास्थ्य चौकी कुम्मायक -५ र २२ गते सेपेनी स्वास्थ्य चौकी कुम्मायक -३ सेपेनीमा हुने भएको गाउँपालिकाले जनाएको छ।