पाँचथर, १५ जेठः
पाँचथरको हिलिहाङ गाउँपालिका ५ नम्बर वडा कार्यालयले गत वर्षको माध्यमिक शिक्षा परीक्षा (एसईई)मा वडाबाट उत्कृष्ट अङ्क ल्याई उत्तिर्ण हुने विद्यार्थीलाई ल्यापटप उपहार दिएको छ ।
अठारौं गणतन्त्र दिवसको अवसर पारेर वडा कार्यालयले आज सोही वडाको देवी योङहाङ स्मृति भवन विद्यार्थी प्रोत्साहन कार्यक्रम आयोजना गरी सर्वोत्कृष्ट अङ्क ल्याउने छात्रा बर्षा थुङ्गिम लिम्बूलाई ल्यापटप उपहार दिएको हो । यहाँको निलगिरी माध्यमिक विद्यालयकी छात्रा थुङ्गिमले ३.७५ जीपीए ल्याइ एसईई उत्तिर्ण गर्नुभएको थियो । छात्रा थुङ्गिमलाई गाउँपालिका अध्यक्ष समरबहादुर अधिकारी, उपाध्यक्ष सुमित्रा सेढाईं तथा वडाध्यक्ष बिर्खबहादुर सुहाङले दोसल्ला र प्रसंशा–पत्रले सम्मान गरी ल्यापटप उपहार दिनुभएको थियो । अन्य विद्यार्थीहरुलाई अध्ययनमा प्रोत्साहित गर्न वडाका अगुवाहरुले उत्कृष्ट अङ्क ल्याउने छात्रालाई सम्मान गरेका थिए ।
वडाध्यक्ष बिर्खबहादुर सुहाङले सामुदायिक विद्यालयको खस्कँदो शैक्षिक गुणस्तर सुधार गर्ने, विद्यार्थी र अभिभावकलाई आकर्षित गर्ने तथा सर्वाधिक अङ्क ल्याई उत्तिर्ण विद्यार्थीलाई उच्च शिक्षा अध्ययनमा सघाउ पु¥याउने उद्देश्यले ल्यापटप वितरण गरिएको वताउनुभयो । वडाले विद्यार्थी प्रोत्साहन कार्यक्रमलाई वार्षिक कार्यक्रममै समावेश गरेको तथा यसको निरन्तरताका लागि कार्यविधि तयार गरी लागू गरिने वडाध्यक्ष सुहाङको भनाइ छ ।
हिलिहाङ गाउँपालिकाका अध्यक्ष समरबहादुर अधिकारीले सामुदायिक विद्यालयमा शैक्षिक गुणस्तर सुधारका लागि रचनात्मक कार्यक्रमलाई अगाडि बढाउनु पर्ने तथा अभिभावकहरु जिम्मेवार हुनुपर्ने अवस्था आएको वताउनुभयो । “अभिभावकहरुले आफ्ना नानीहरुको पढाइप्रति चासो बढाउने हो भने मात्रै सामुदायिक विद्यालयको शैक्षिक स्तर उकास्न सकिन्छ”, अधिकारीले भन्नुभयो, “यस्तै रचनात्मक कार्यक्रमबाट अभिभावक र विद्यार्थीलाई जागरुक बनाउन गाउँपालिकाले समेत प्रयास गर्नेछ ।” विषयत शिक्षक नपाउने समस्याले समेत शैक्षिक गुणस्तर उकास्न कठिन भएको अध्यक्ष अधिकारीको भनाइ छ ।
गत वर्षको एसईई परीक्षामा उक्त वडामा रहेका निलगिरी माध्यमिक विद्यालयबाट १९ जना तथा सरस्वती माध्यमिक विद्यालयबाट १४ जना विद्यार्थी एसईईमा सामेल भएका थिए । उत्कृष्ट अङ्क ल्याउने छात्रालाई रु. ८० हजार मूल्यको ‘कोर आई फाइभ’ ल्यापटप उपहार दिइएको वडाध्यक्ष सुहाङले वताउनुभयो । वडा कार्यालयले विद्यार्थीहरुलाई प्रोत्साहित गर्न थालेकामा अभिभावकहरुले खुशी ब्यक्त गर्दै यो कार्यक्रमको निरन्तरताको माग गर्नुभयो । गणतन्त्र दिवसको अवसर पारेर यस प्रकारको कार्यक्रम गर्नाले शासन ब्यवस्थाप्रति जनताको अपनत्व वृद्धि हुने अपेक्षा समेत गरिएको हिलिहाङ गाउँ कार्यपालिकाका सदस्य वीरेन्द्र मंग्राती वताउनुहुन्छ । हिलिहाङ गाउँपालिकाका शिक्षा अधिकृत केशव तिम्सिनाले भविश्यसम्म प्रयोग हुने ल्यापटप उपहार दिएर विद्यार्थीलाई प्रोत्साहित गर्ने कार्यक्रम पालिकामा पहिलो भएको वताउनुभयो ।
