छुरी प्रहारबाट पाँचथरमा एक जनाको मृत्यु, अभियुक्त पक्राउ

पाँचथर, मंसिर २८ —पाँचथर जिल्लाको फाल्गुनन्द गाउँपालिका–७, खामेलकमा छुरी प्रहारबाट एक जनाको मृत्यु भएको छ।

मिति २०८२ मंसिर २८ गते अपराह्न करिब ४ बजे आफ्नै घरको आँगनमा ८२ वर्षीय वर्ण सिंह आङदेम्बेले आफ्नै भतिजो चन्द्रबहादुर आङदेम्बेका ३६ वर्षीय छोरा प्रेमराज आङदेम्बेमाथि छुरी प्रहार गरेका थिए। छुरी प्रहारबाट गम्भीर घाइते भएका प्रेमराज आङदेम्बेको घटनास्थलमै मृत्यु भएको प्रहरीले जनाएको छ।

घटनाको सूचना प्राप्त हुनासाथ प्रहरी चौकी आङसाराङबाट खटिएको प्रहरी टोली घटनास्थलमा पुगेको थियो। प्रहरीका अनुसार घटनामा प्रयोग गरिएको छुरीसहित अभियुक्त वर्ण सिंह आङदेम्बेलाई नियन्त्रणमा लिइएको छ।

प्रारम्भिक अनुसन्धानअनुसार छुरी लुकाइदिएको विषयलाई लिएर उत्पन्न विवादका क्रममा घटना भएको देखिएको छ। घटनास्थल सुरक्षित राखी थप अनुसन्धानका लागि जिल्ला प्रहरी कार्यालय पाँचथरबाट प्रहरी नायब उपरीक्षक अनिश कुमार कर्णको कमाण्डमा SOCO सहितको प्रहरी टोली खटिएको थियो।

कानुनी प्रक्रिया पूरा गरी मृतकको शव मंसिर २८ गते राति ९ बजेर २० मिनेटमा जिल्ला अस्पताल पाँचथर, फिदिम ल्याई शवगृहमा सुरक्षित राखिएको छ। साथै अभियुक्तलाई जिल्ला प्रहरी कार्यालय पाँचथरमा ल्याई स्वास्थ्य परीक्षण गराई हिरासत कक्षमा राखिएको प्रहरीले जनाएको छ।

घटनासम्बन्धी थप अनुसन्धान जारी रहेको जिल्ला प्रहरी कार्यालय पाँचथरले जनाएको छ।