एमाले पाँचथर जिल्ला इन्चार्जको जिम्मेवारी पुनः नेम्वाङलाई

पाँचथर । नेकपा (एमाले) पाँचथर जिल्ला इन्चार्जको जिम्मेवारी पुनः संविधान सभा सदस्य तथा नेकपा एमाले केन्द्रीय सदस्य आइन्द्र सुन्दर नेम्वाङलाई तोकिएको छ। मंगलबार बसेको पार्टी सचिवालय बैठकले नेम्वाङलाई पाँचथर जिल्ला इन्चार्जको जिम्मेवारी प्रदान गर्ने निर्णय गरेको हो।

नेकपा (एमाले) को ११ औँ राष्ट्रिय महाधिवेशनमा आदिवासी जनजाति खुला क्लष्टरबाट १,६९९ मत प्राप्त गर्दै केन्द्रीय सदस्यमा निर्वाचित नेम्वाङलाई जिल्लामा पार्टी संगठन सुदृढीकरण, गतिविधि विस्तार तथा स्थानीय तहसँगको समन्वयलाई अझ प्रभावकारी बनाउन पुनः जिम्मेवारी दिइएको हो। यसअघि पनि नेम्वाङ केन्द्रीय सदस्यको जिम्मेवारीसँगै पाँचथर जिल्ला इन्चार्जको भूमिकामा रहनुभएको थियो।

यसैबीच, सोही सचिवालय बैठकले पार्टी सचिव तथा पूर्वमुख्यमन्त्री शेरधन राईलाई कोशी प्रदेश इन्चार्जको जिम्मेवारी दिएको छ। बैठकले कोशी प्रदेशअन्तर्गतका अन्य जिल्लाका जिल्ला इन्चार्जहरूको जिम्मेवारीसमेत तोकेको छ।

बैठकको निर्णयअनुसार कोशी प्रदेशअन्तर्गतका जिल्ला इन्चार्जहरू यसप्रकार छन्— ताप्लेजुङ– तिलकुमार मेयाङ्बो, पाँचथर– आइन्द्र सुन्दर नेम्वाङ, इलाम– राम राना, झापा– रोम ओली, मोरङ– ऋषिकेश पोखरेल, सुनसरी– जगदीश कुसियैत, उदयपुर– मञ्जु चौधरी, खोटाङ– विशाल भट्टराई, ओखलढुङ्गा– यज्ञराज सुनुवार, सोलुखुम्बु– मानवीर राई, भोजपुर– हेमराज राई, सङ्खुवासभा– तुलसी न्यौपाने, तेह्रथुम– विष्णुमाया विक र धनकुटा– राजेन्द्र राई।