पाँचथर । छमछमी मेला–२०८२ को अवसरमा याङवरक गाउँपालिका–६, नागि स्थित मुकुबुङ बजारमा मुकुबुङ युवा क्लबद्वारा आयोजित अन्तरपालिका स्तरीय खुला पुरुष भलिबल प्रतियोगिताको उपाधि याङवरक गाउँपालिका, पाँचथरले जितेको छ। शनिबार सम्पन्न फाइनल खेलमा याङवरक गाउँपालिकाले पाथिभरा याङवरक गाउँपालिका, ताप्लेजुङलाई ३–२ सेटले पराजित गर्दै उपाधि हात पारेको हो।
फाइनल खेल अत्यन्तै रोमाञ्चक रह्यो। पहिलो सेट पाथिभरा याङवरकले २५–१५ ले जितेको थियो भने दोस्रो र तेस्रो सेट याङवरक गाउँपालिका, पाँचथरले २५–२२ र २५–२२ ले आफ्नो पक्षमा पारेको थियो। चौथो सेट पाथिभरा याङवरकले २५–२० ले जितेपछि खेल निर्णायक पाँचौँ सेटमा पुगेको थियो, जहाँ याङवरक गाउँपालिकाले १५–९ को जित निकाल्दै उपाधि सुनिश्चित गरेको हो।
प्रतियोगिताको प्रथम पुरस्कार स्व. आमा गुनमाया श्रेष्ठको स्मृतिमा उनका छोरा लक्ष्मी श्रेष्ठद्वारा प्रायोजन गरिएको नगद रु. १,०२,१११ सहित ट्रफी, मेडल र प्रमाणपत्र रहेको थियो भने दोस्रो पुरस्कार नगद रु. ५१,१११ सहित ट्रफी, मेडल र प्रमाणपत्र प्रदान गरिएको थियो। व्यक्तिगत विधातर्फ उत्कृष्ट सर्भर याङवरक गाउँपालिका, पाँचथरका रोमन बस्नेत, उत्कृष्ट डिफेन्डर पाथिभरा याङवरक गाउँपालिका, ताप्लेजुङका गिरिराज श्रेष्ठ, उत्कृष्ट ब्लकर पाथिभरा याङवरक गाउँपालिकाका प्रकाश लिम्बु, उत्कृष्ट सेटर याङवरक गाउँपालिका, पाँचथरका मनोज घिमिरे, उत्कृष्ट स्पाइकर पाथिभरा याङवरक गाउँपालिका, ताप्लेजुङका लिला डाँगी र सर्वोत्कृष्ट खेलाडी याङवरक गाउँपालिका, पाँचथरका विष्णु बस्नेत घोषित भए।
मुकुबुङ युवा क्लबद्वारा आयोजित उक्त प्रतियोगितामा आयोजक टिमसहित पाँचथर, तेह्रथुम र ताप्लेजुङ जिल्लाका गरी ८ टिमको सहभागिता रहेको थियो। कार्यक्रमका प्रमुख अतिथि याङवरक गाउँपालिका, पाँचथरका अध्यक्ष भीम बहादुर योङया रहनुभएको थियो भने विशिष्ट अतिथिका रूपमा हिलिहाङ गाउँपालिकाका अध्यक्ष समर बहादुर अधिकारी सहभागी रहनुभएको थियो। कार्यक्रमको अध्यक्षता मुकुबुङ युवा क्लबका अध्यक्ष हेमकुमार नेउरुम्बाले गर्नुभएको थियो भने छमछमी मेला–२०८२ पौष २४ गतेदेखि २६ गतेसम्म सञ्चालन भएको थियो।
