बिम गाउँमा पक्की पदमार्ग

-- Sponsored --

AI सारांश

Fast AI

१. मालिका गाउँपालिका–७ बिमको तल्लो र डाँडागाउँको पदमार्गलाई पक्की बनाइएको छ, जसले गाउँको सौन्दर्यकरणमा सहयोग पुर्‍याएको छ।
२. गण्डकी प्रदेश सरकारको सहयोगमा आर्थिक वर्ष २०८०-८१ देखि सुरु भएको पदमार्ग निर्माणकार्यलाई चालु आर्थिक वर्षमा पूर्णता दिइएको छ, जसबाट २०० भन्दा बढी घरपरिवार लाभान्वित भएका छन्।
३. पदमार्ग निर्माणका लागि विनियोजन भएको बजेटले गाउँलाई सफा र स्थानीयवासीलाई सहज बनाएको छ, साथै बालबालिका र ज्येष्ठ नागरिकलाई आवतजावत र हिँडडुल गर्न सहज भएको छ।

म्याग्दी, ६ जेठ : यहाँको मालिका गाउँपालिका–७ बिमको तल्लो र डाँडागाउँको पदमार्गलाई पक्की बनाइएको छ। गाउँको सौन्दर्यकरणका लागि बस्तीभित्रको कच्ची पैदलमार्गलाई ढलान गरेर पक्की बनाइएको हो। डाँडागाउँकी मङ्गली पुनले पक्की पदमार्ग निर्माण भएपछि हिलो र धुलोको समस्या हट्नुका साथै गाउँ सफासुग्घर भएको बताउनुभयो।

“उकालो, ओरालोमा हिँडडुल गर्दा चिप्लिएर लड्ने, भारी बोकेर हिँड्न गाह्रो भएको थियो, पक्की पदमार्गले गाउँलाई सफा र स्थानीयवासीलाई सहज बनाएको छ”, उहाँले भन्नुभयो। बर्खामा झाडीमा भिज्दै हिँड्नुपर्ने समस्या हटेको र सर्पले टोक्ने जोखिम घटेको पुनले बताउनुभयो।

पदमार्ग बनेपछि बिम र डाँडागाउँमा २०० भन्दा बढी घरपरिवार लाभान्वित भएका छन्। बालबालिका र ज्येष्ठ नागरिकलाई आवतजावत र हिँडडुल गर्न सहज भएको छ। गण्डकी प्रदेश सरकारको सहयोगमा आर्थिक वर्ष २०८०-८१ देखि सुरु भएको पदमार्ग निर्माणकार्यलाई चालु आर्थिक वर्षमा पूर्णता दिइएको हो।

पहिलो वर्ष पूर्वाधार विकास कार्यालयमार्फत विनियोजन भएको रु ३० लाख बजेटबाट बिम तल्लोगाउँमा ४२५ र डाँडागाउँमा २५० मिटर पदमार्ग निर्माण भएको थियो। आव २०८१÷८२ मा रु १० लाख बजेटबाट तल्लो गाउँमा २९० मिटर नाली र त्यसमाथि पक्की पदमार्ग बनाइएको एकीकृत सेवा कार्यालयका इन्जिनियर सुमन बोगटीले बताउनुभयो ।

उहाँका अनुसार चालु आवमा एकीकृत सेवा कार्यालयमार्फत विनियोजन भएको रु १० लाख बजेटबाट डाँडागाउँमा ५५० मिटर पदमार्ग निर्माण भएको छ। तेर्सोमा ढुङ्गा बिछ्याएर र उकालोमा सिँढी चिनेर ढलान गरिएको छ। एक दशमलव १० देखि एक दशमलव २० मिटर फराकिलो पदमार्ग निर्माण भएको छ। पदमार्गमा मोटरसाइकल र साइकल पनि हिँडाउन सकिने डाँडागाउँ पदमार्ग निर्माण समितिका अध्यक्ष भलाराम जुग्जालीले बताउनुभयो।

माटे पदमार्गमा वर्षा हुँदा हिलो र सुक्खामा धुलोको समस्या थियो। ढलान गरेको पदमार्ग सरसफाइ गर्न सहज भएको तल्लोगाउँका धनकुमार जुग्जालीले बताउनुभयो। तल्लोगाउँमा पदमार्ग निर्माणका लागि चालु आवमा एकीकृत सेवा कार्यालयमार्फत विनियोजन भएको रु पाँच लाख बजेट भने इन्धन र निर्माण सामग्रीको मूल्यवृद्धिका कारण कार्यान्वयन गर्न नसकिएको उहाँले बताउनुभयो।

बिम र डाँडागाउँ धार्मिक पर्यटकीयस्थल मालिका र प्रभु चेला धुरीको फेदीका बस्ती हुन्। मालिका र प्रभुचेला जाने पर्यटक तथा भक्तजन बसोबास गर्ने बिम र डाँडगाउँको पृष्ठभूमिमा गुर्जा हिमालको मनमोहक दृश्यावलोकन गर्न सकिन्छ। सरसफाइमा नमूना बनाउने उद्देश्यले गाउँभित्रको पैदलमार्गलाई पक्की बनाउन बजेट विनियोजन गरेको स्थानीयवासीसमेत रहनुभएका गण्डकी प्रदेशसभा सदस्य रेशमबहादुर जुग्जालीले बताउनुभयो।

प्रदेश सरकारका पूर्वभौतिक पूर्वाधार विकास तथा यातायात व्यवस्थामन्त्रीसमेत रहनुभएका जुग्जालीले स्तरोन्नतिका क्रममा रहेको खारा–बिम सडक स्तरोन्नति योजनामार्फत तल्लोगाउँ र डाँडागाउँ बस्तीभित्रको सडक कालोपत्र हुने जानकारी दिनुभयो।

यो खबर पढेर तपाईलाई कस्तो महसुस भयो ?

खुसी

दुःखी

आक्रोशित

ट्रेन्डिङ +