राष्ट्रिय युवा संघ पाँचथरमा पुन: लावती

फिदिम। राष्ट्रिय युवा संघ नेपाल पाँचथरको आठौं अधिवेशनले मदन लावतीको अध्यक्षतामा ४१ सदस्यीय नयाँ कमिटी निर्वाचित गरेको छ।

हिँजो फिदिममा सम्पन्न अधिवेशनबाट उपाध्यक्षमा ऋतुवर्ण तुम्बापो, सचिवमा सुजन तुम्बापो, सहसचिवमा इल्लु मेन्याङ्बो र बेताब जबेगू तथा कोषाध्यक्षमा मनिला शेर्पा निर्वाचित हुनुभएको राष्ट्रिय युवा संघ नेपालका स्थायी कमिटी सदस्य गणेश योङहाङले जानकारी दिनुभयो।

अध्यक्ष लावती र उपाध्यक्ष तुम्बापो पुरानै जिम्मेवारीमा दोहोरिनु भएको छ भने यसअघिका सहसचिव सुजन सचिवमा निर्वाचित हुनु भएको हो।

अधिवेशनको उदघाटन कार्यक्रमलाई राष्ट्रिय युवा संघ नेपालका अध्यक्ष क्षितिज थेबे, नेकपा (एमाले) स्थायी कमिटी सदस्य भानुभक्त ढकाल, एमाले कोशी प्रदेश कमिटीका सचिव राजकुमार भण्डारी, एमाले पाँचथरका अध्यक्ष विष्णुप्रसाद सापकोटा, अखिल नेपाल महिला संघ पाँचथरमा अध्यक्ष मुना नेम्बाङ लगायतले शुभकामना मन्तव्य राख्नुभएको थियो।