खोलामा फसेकाहरुको १२ घण्टापछि उद्धार

पाँचथर, ११ भदौः

पाँचथर–ताप्लेजुङ सीमा भएर बग्ने इवा खोलाका दुई भंगालोको वीचमा फसेका चार जनालाई १२ घण्टापछि उद्धार गरिएको छ ।

पाँचथरको याङवरक गाउँपालिका–२ र ताप्लेजुङको सिदिङ्वा गाउँपालिका–२ को सीमास्थित इवा खोलामा पाहा मार्न गएका उनीहरु खोलामा पानीको बहाव बढेपछि हिँजो साँझ ७ बजेदेखि फसेका थिए । खोलाका दुवै भंगालोमा पानी बढेपछि उनीहरु रात त्यहीं विताएका थिए। राती नै प्रहरीले आगो बाल्ने ब्यवस्था गर्नुका साथै चाउचाउ खाने ब्यवस्था मिलाएको थियो ।

विहान सीमा प्रहरी चौकी च्याङथापूबाट प्रहरी बरिष्ठ नायव निरीक्षक भीमराज थेबेसहिको प्रहरी टोली र करीव ४० जना स्थानीयवासी भेला भई आज विहान ८ बजे बाँसको फड्के थापेर उनीहरुको उद्धार गरेका हुन । उद्धार गरिएकाहरुमा फिदिम नगरपालिका–४ जोरसाल बस्ने प्रदीप तामाङ, झल्ला सम्बाहाम्फे र शेरबहदादुर मगर तथा ताप्लेजुङको सिदिङ्वा गाउँपालिका–४ का सन्तोष पन्धाक छन । उनीहरु फसेको देखेपछि अस्थायी प्रहरी चौकी फलैंचाका प्रहरी र केही स्थानीयवासी रातभरि खोला किनारामा बसेका थिए ।