मिक्लाजुङमा करेन्ट लागेर एक पुरुषको मृत्यु

पाँचथर, माघ ११-पाँचथरको मिक्लाजुङ गाउँपालिका–२ सप्तमीस्थित सौर्य ऊर्जा मिनी ग्रिड विद्युत कार्यालयमा कार्यरत ४१ वर्षीय चन्द्र रैका मगरको करेन्ट लागेर मृत्यु भएको छ।

बुधबार साँझ करीब ७ बजे विद्युत पंखाको ट्रान्समिटर मर्मत गर्ने क्रममा अचानक करेन्ट लागेपछि उनी घटनास्थलमै झुण्डिएको अवस्थामा फेला परेको इलाका प्रहरी कार्यालय, रविले जनाएको छ।

घटनाबारे मिक्लाजुङ गाउँपालिकाका उपाध्यक्ष सन्तकुमार शेर्माले राति ८:३० बजे इलाका प्रहरी कार्यालय, रविमा जानकारी गराएका थिए। सूचना प्राप्तलगत्तै प्रहरी निरीक्षक ढुण्डीराज गिरीको नेतृत्वमा प्रहरी टोली घटनास्थल पुगेर आवश्यक कानुनी प्रक्रिया पुरा गरी शव पोष्टमार्टमका लागि रवि आधारभूत अस्पतालको शवगृहमा पठाइएको थियो।

मृतकको शव हाल सोही अस्पतालको शवगृहमा राखिएको छ। घटनाको थप अनुसन्धान भइरहेको प्रहरीले जनाएको छ।